| 1 | Spes deus, aeternae stationis conciliator, si castis precibus veniales invigilamus, his, pater, oratis placabilis adstipulare. |
| 2 | da, Christe, specimen cognoscier inreprehensum. |
| 3 | rex bone, cultorum famulantum vivificator, cum patre maiestas altissima non generato, da trinum columen paraclito consociante, ut longum celebris devotio continuetur. |
| 4 | ad temet properant vigilatum convenienter. |
| 5 | nox lucem revebet funalibus anteferendam, nox lumen pariens credentibus indubitatum, nox flammis operum meditatrix sidereorum. |
| 6 | tu mensis dirimis ieiunia relligiosa, tu bona promittens surgentia concelebraris: da, rector, modicos affarier omnipotentem, fons tuus emundat recreatu iustificatos, dans mentem oblitam positorum flagitiorum, dans agnos niveos splendescere purificatos, ut nova Iordanis ablutio sanctificavit, cum sua dignati tingentia promeruerunt. |
| 7 | lux verbo inducto peccantibus auxiliatrix et Christus regimen elementis inrequietis fert undam medici baptismatis intemeratam, ut noxam auferret mortalibus extenuatam. |
| 8 | crux poenae extremum properatast inmaculato, ut vitam amissam renovaret mortificatus. |
| 9 | quis digne domino praeconia continuabit, tot rerum titulis obnoxius immodicarum? an terra humano locupletat conmemoratu, quem vocum resonat modulatus angelicarum? dans aulam Stephane pretiosam dilapidato, dans claves superas cathedralis incohatori, quin Paulum infestum copularis adglomeratu. |
| 10 | fit doctor populi lapidantum constimulator, ut latro confessor paradisum participavit. |
| 11 | sic, credo, adnectens durissima clarificandis nos seros famulos adcrescere perpetieris sub tali edoctos antistite relligionis. |
| 12 | da sensum solida stabilitum credulitate, fac iungar numero redivivo glorificatus, ad caelum invitans consortia terrigenarum, spes deus, aeternae stationis conciliator. |