| 1 | PRIMUS iucundi foret 1 hic tibi fructus honoris Augustae faustum munus habere manus: proximus ex longo gradus est quaestoris amici curam pro strenis excubuisse tuis. |
| 2 | ergo interceptos regale nomisma Philippos accipe tot numero, quot duo Geryones; quot terni biiuges demptoque triente Camenae quotque super terram sidera zodiaci; quot commissa viris Romana Albanaque fata quotque doces horis quotque domi resides; ostia quot pro parte aperit stridentia circus excepto, medium quod patet ad stadium; quot pedibus gradiuntur apes et versus Homeri quotque horis pelagus profluit aut refluit; protulit in scaenam quot dramata fabellarum, Arcadiae medio qui iacet in gremio, vel quot iuncturas geometrica forma favorum conserit extremis omnibus et mediis; quot telios primus numerus solusque probatur; quot par atque impar partibus aequiperat, bis ternos et ter binos qui conserit unus, qui solus totidem congeminatus habet, quot faciunt iuneti subterque supraque locati; qui numerant Hyadas Pleiadasque simul. |
| 3 | Tot numero auratos pro strenis accipe nummos 1 Ursule collega nobilis Harmonio, Harmonio, quem Claranus, quem Scaurus et Asper, quem sibi conferret Varro priorque Crates quique sacri lacerum collegit corpus Homeri quique notas spuriis versibus adposuit: Cecropiae commune decus Latiaeque camenae, solus qui Chium miscet et Ammineum. |