| 1 | Phoebe potens numeris, praeses Tritonia bellis, Tu quoque ab aerio praepes Victoria lapsu, Come serenatam duplici diademate frontem, Serta ferens, quae dona togae, quae praemia pugnae. |
| 2 | Bellandi fandique potens Augustus, honorem Bis meret: ut geminet titulos, qui praelia Musis Temperat, et Geticum moderatur Apolline Martem. |
| 3 | Arma inter Chunosque truces, furtoque nocentes Sauromatas, quantum cessat de tempore belli, Indulget Clariis tantum inter castra Camoenis. |
| 4 | Vix posuit volucres stridentia tela sagittas, Musarum ad calamos fertur manus, otia nescit, Et commutata meditatur arundine carmen. |
| 5 | Sed carmen non molle modis, bella horrida Martis Odrysii, Thressaeque viraginis arma retractat. |
| 6 | Exsulta, Aeacide, celebraris vate superbo Rursum: Romanusque tibi contingit Homerus. |