Aurelius Victor, de Viris Illustribus, 11

monumenta.ch > Aurelius Victor > 11
Aurelius Victor, de Viris Illustribus, X <<< >>> XII

Aurelius Victor, de Viris Illustribus, Caput XI

1 Porsenna rex Etruscorum cum Tarquinios in urbem restituere temptaret et primo impetu Ianiculum cepisset, Horatius Cocles (illo cognomine, quod in alio proelio oculum amiserat) pro ponte sublicio stetit et aciem hostium solus sustinuit, donec pons a tergo interrumperetur, cum quo in Tiberim decidit et armatus ad suos transnavit. 2 Ob hoc ei tantum agri publice datum, quantum uno die ambire <vomere> potuisset. Statua quoque ei in Vulcanali posita.