Augustinus, De Genesi ad litteram, 11, 10, 13.
| 1 | Sed posset, inquiunt, etiam ipsorum voluntatem in bonum convertere, quoniam omnipotens est. |
| 2 | Posset plane. |
| 3 | Cur ergo non fecit? Quia noluit. |
| 4 | Cur noluerit, penes ipsum est. |
| 5 | Debemus enim non plus sapere quam oportet sapere (Rom. XII, 3). |
| 6 | Puto autem paulo ante satis nos ostendisse non parvi boni esse rationalem creaturam, etiam istam quae malorum comparatione cavet malum: quod genus bonae creaturae utique non esset, si omnium malas voluntates in bonum Deus convertisset, et nulli iniquitati poenam debitam infligeret; ac sic non esset nisi solum illud genus, quod nulla vel peccati vel supplicii malorum comparatione proficeret. |
| 7 | Ita velut aucta numerositate excellentioris generis, ipsorum generum bonorum numerus minueretur. |