Ambrosius, Epistolarum classis I, 46, 13.
| 1 | Servus, peccatum, maledictum factus est, ut tu peccati servus esse desisteres, et te divinae sententiae maledicto absolveret. |
| 2 | Ille ergo maledictum suscepit tuum: Maledictus enim omnis, qui pendet in ligno (Galat. III, 13). |
| 3 | Ille maledictum in cruce factus est, ut tu benedictus esses in Dei regno. |
| 4 | Ille dehonestatus et depretiatus est, nec aliquid aestimatus. |
| 5 | Ille dicebat: In vacuum laboravi (Esai. XLIX, 4); per quem meruit Paulus dicere: Non in vacuum laboravi (Phil. II, 16); ut boni operis fructum, et Evangelicae praedicationis gloriam suis conferret servulis, per quam universi sarcina laboris absolverentur. |