Ambrosius, Epistolarum classis I, 44, 4.
| 1 | Novit ogdoaden istam, quam octavam Latine dicimus, vetus Testamentum; siquidem ait Ecclesiastes: Da partem illis septem, et illis quidem octo (Eccles. XI, 2). |
| 2 | Hebdomas veteris Testamenti est octava novi, quando Christus resurrexit, et dies omnibus novae salutis illuxit. |
| 3 | Ille dies, de quo ait propheta: Hic dies, quem fecit Dominus, exsultemus et laetemur in eo (Psal. CXVII, 24); quo die se fulgor plenae atque perfectae circumcisionis humanis peccatoribus infudit. |
| 4 | Propterea et vetus Testamentum dedit partem octavae in circumcisionis solemnitate. |
| 5 | Sed illa adhuc in umbra latebat: venit sol iustitiae (Malac. IV, 2), et consummatione passionis propriae revelavit sui luminis radios: quos retexit omnibus, et vitae claritatem aperuit aeternae. |