Ambrosius, Epistolarum classis I, 43, 7.
| 1 | Specta aliud. |
| 2 | In omnibus rebus praestantiora sunt principia et finis. |
| 3 | Si domum consideres, potiora omnibus fundamenta et culmina: si agrum, satio et messis, plantatio et vindemia. |
| 4 | Quam iucunda insitiva arborum, quam fructus votivi! Ita ergo et coelum primo est conditum, novissimus homo, quasi quaedam coelestis in terris creatura. |
| 5 | Nam et si corpore cum bestiis confertur, animo tamen coelestibus annumeratur; sicut enim portavimus imaginem terreni, ita portamus et imaginem coelestis (I Cor. XV, 49). |
| 6 | Quomodo non coelestis, qui ad imaginem et similitudinem factus est Dei (Gen. I, 26)? |