Ambrosius, Epistolarum classis I, 41, 1.
| 1 | Sollicitam sanctitatem tuam esse adhuc scribere dignata es mihi, eo quod sollicitum me esse scripserim; unde miror quod litteras non acceperis meas, quibus refusam mihi scripseram securitatem. |
| 2 | Nam cum relatum esset synagogam Iudaeorum incensam a christianis, auctore episcopo, et Valentinianorum conventiculum; iussum erat, me Aquileiae posito, ut synagoga ab episcopo reaedificaretur, et in monachos vindicaretur, qui incendissent aedificium Valentinianorum. |
| 3 | Tum ego, cum saepius agendo parum proficerem, epistolam dedi imperatori, quam simul misi; et ubi processit ad Ecclesiam, hunc sermonem habui: |