Ambrosius, Epistolarum classis I, 35, 10.
| 1 | Similiter sancti primitiae sunt Domini, praecipue apostoli; primum enim Deus posuit in Ecclesia apostolos, qui et pleraque prophetarunt, et evangelizarunt Dominum Iesum; quia primi receperunt eum (I Cor. XII, 28). |
| 2 | Recepit eum Simeon propheta (Luc. II, 28), Zacharias propheta, Ioannes filius eius, Nathanael, in quo dolus non erat (Ioan. I, 47); et ideo sub ficu requiescebat: Ioseph, qui dicebatur iustus, qui sepelivit eum (Luc. XXIII, 53). |
| 3 | Isti sunt primitiae fidei nostrae; sed tamen eadem caeterorum natura seminum, quae primitiarum, licet in aliquibus minor gratia: Potens est enim Deus ex lapidibus filios Abrahae excitare (Matth. III, 9). |