Ambrosius, Epistolarum classis I, 35, 4.
| 1 | Qui spiritu, inquit (Ibid., 13), facta carnis mortificat, vivet. |
| 2 | Nec mirum si vivat, cum Filius Dei fiat, qui habet Spiritum Dei. |
| 3 | Adeo est Filius Dei, ut non accipiat spiritum servitutis, sed spiritum adoptionis filiorum; eousque ut testimonium spiritui nostro sanctus Spiritus reddat quod sumus filii Dei. |
| 4 | Testimonium autem hoc est Spiritus sancti, quod ipse est qui clamat in cordibus nostris: Abba pater, sicut ad Galatas scriptum est (Galat. IV, 6). |
| 5 | Sed et illud grande testimonium quod filii sumus Dei; quia sumus haeredes Dei, cohaeredes autem Christi: cohaeres autem est eius, qui conglorificatur ei: conglorificatur vero illi, qui patiendo pro ipso, compatitur ei (Rom. VIII, 16 et seq.). |