Ambrosius, Epistolarum classis I, 26, 16.
| 1 | Denique discedentibus illis, remansit solus Iesus, et mulier in medio stans. |
| 2 | Donaturus peccatum, solus remanet Iesus, sicut ipse ait: Ecce venit hora, et iam venit, ut dispergamini unusquisque in sua, et me solum relinquatis (Ioan., XVI, 32); non enim legatus, neque nuntius, sed ipse Dominus salvum fecit populum suum (Esai. LXIII, 8). |
| 3 | Solus remanet; quia non potest hoc cuiquam hominum cum Christo esse commune, ut peccata condonet. |
| 4 | Solius hoc munus est Christi, qui tulit peccatum mundi (Ioan. I, 29). |
| 5 | Meruit et mulier absolvi, quae recedentibus Iudaeis, remansit sola cum Iesu. |