Ambrosius, Epistolarum classis I, 19, 4.
| 1 | Non dabis pecuniam tuam ad usuram; quoniam scriptum est quod is qui pecuniam suam non dedit ad usuram, habitabit in tabernaculo Dei (Ps. XIV, 5); nam ille supplantatur, qui usurarum captat emolumenta. |
| 2 | Itaque vir christianus si habet, det pecuniam quasi non recepturus: aut certe sortem, quam dedit, recepturus. |
| 3 | Habet in ea non mediocrem gratiae usuram. |
| 4 | Alioquin decipere istud est, non subvenire. |
| 5 | Quid enim durius, quam ut des pecuniam tuam non habenti, et ipse duplum exigas? Qui simplum non habuit unde solveret, quemadmodum duplum solvet? |