Ambrosius, Epistolarum classis I, 13, 1

1	Sanctum animum tuum Deo omnipotenti pura et sincera fide deditum sciebamus: sed recentibus cumulasti beneficiis, quod catholicos Ecclesiis reddidisti, Imperator Auguste.
2	Atque utinam catholicos ipsos reverentiae veteri reddidisses, ut nihil novarent contra praescripta maiorum, nec temere vel servanda rescinderent, vel rescindenda servarent.
3	Itaque dolentius forte quam inconsultius ingemiscimus, Imperator, facilius expelli potuisse haereticos, quam inter catholicos convenire.
4	Quanta enim nuper confusio facta sit, explicari non potest.