Ambrosius, Epistolarum classis I, 2, 1.
| 1 | Suscepisti munus sacerdotii, et in puppe Ecclesiae sedens, navim adversus fluctus gubernas. |
| 2 | Tene clavum fidei, ut te graves huius saeculi turbare non possint procellae. |
| 3 | Mare quidem magnum et spatiosum, sed noli vereri; quia ipse super maria fundavit eam, et super flumina praeparavit eam (Ps. XXIII, 2). |
| 4 | Itaque non immerito inter tot mundi freta Ecclesia Domini tamquam supra apostolicam aedificata petram immobilis manet, et inconcusso adversum impetus saevientis sali perseverat fundamine (Matth. XVI, 18). |
| 5 | Alluitur undis, non quatitur: et licet frequenter elementa mundi huius magno illisa resultent fragore; habet tamen quo laborantes excipiat, tutissimum portum salutis. |