| 1 | Geraseni praesentiam Christi ferre non poterant (Luc. VIII, 37), isti peiores Gerasenis nec laudationem Christi sustinere possunt. |
| 2 | Vident pueros Christi gloriam concinentes; quia scriptum est: Ex ore infantium et lactentium perfecisti laudem (Psal. VIII, 3). |
| 3 | Irrident istam aetatulam fidei plenam, cum dicunt: Ecce quid clamant? Sed respondit iis Christus: Si hi tacebunt, lapides clamabunt (Luc. XIX, 35), hoc est, fortiores clamabunt, clamabunt et iuvenes, clamabunt et maturiores, clamabunt et senes: isti lapides ad illum iam solidati lapidem, de quo scriptum est: Lapidem quem reprobaverunt aedificantes, hic factus est in caput anguli (Psal. CXVII, 22). |