Ambrosius, Epistolarum classis I, RELATIO SYMMACHI URBIS PRAEFECTI., 6.
| 1 | « Ubi in leges vestras et verba iurabimus? qua religione mens falsa terrebitur; ne in testimoniis mentiatur? Omnia quidem Deo plena sunt, nec ullus perfidis tutus est locus: sed plurimum valet ad metum delinquendi etiam praesentia religionis urgeri. |
| 2 | Illa ara concordiam tenet omnium, illa ara fidem convenit singulorum: neque aliquid magis auctoritatem facit sententiis nostris, quam quod omnia quasi iuratus noster ordo decernit. |
| 3 | Patebit ergo sedes profana periuriis, et hoc inclyti principes mei probabile iudicabunt, qui sacramento publico tuti sunt. |