Ambrosius, De Tobia, § 78
| 1 | Redde inquit proximo in tempore, coangusta uerbum et fideliter age cum illo, et in omni tempore inuenies quod tibi necessarium sit. |
| 2 | non amat multis innocentia se defendere. |
| 3 | Susanna uocis adsertione non eguit: uerbum coangustauit ad dominum et statim adipisci meruit castitatis propriae testimonium. |
| 4 | plurima presbyteri loquebantur, qui laborabant uerborum fuco obducere ueritatem, sed non filia Iuda. |
| 5 | tacuit aput homines, locuta est deo. |
| 6 | erubescenda erat in plebe ipsa defensio muliebris et,dum pudor defenditur, inpudentia praetendebatur. |
| 7 | coangustauit uerbum dicens ad dominum: tu scis quia falsa dixerunt de me. |
| 8 | et dominus spiritum Danielis pueri castitatis excitauit ultorem. |