Ambrosius, De Helia et ieiunio, § 16
| 1 | ipsum quoque ieiunantem non uoces magnae, non fulgora et nubes nimbosa, non fumigans Sina perterruit. |
| 2 | neque uero introisset in nubem et uocem dei loquentis de medio ignis sine periculo salutis audisset nisi munitus armis ieiunii. |
| 3 | quadraginta enim diebus ieiunauit in monte, cum legem acciperet a domino deo nostro. |
| 4 | et in superioribus quidem montis lex dabatur Moysi ieiunauti, in inferioribus populo manducanti praeuaricatio sacrilega luxu accendebatur epulantium. |
| 5 | quo spectaculo motus fregit tabulas Moyses indignum iudicans ut ebrio populo lex daretur. |