Ambrosius, De Helia et ieiunio, § 10
| 1 | Nudatus erat Noe, quando inebriatus est: texit eum pietas filiorum. |
| 2 | at nudatus erat per ignorantiam, non per intemperantiam; adhuc enim uinum nesciebatur. |
| 3 | in principio generis humani ignorabatur ebrietas. |
| 4 | primus uineam ipse plantauit: dedit naturam, ignorauit potentiam. |
| 5 | itaque uinum nec suo pepercit auctori. |
| 6 | quid mirum si, cum dominus ipse creaturas suas laudauerit, et iste miratus est? itaque cum delectaret eum reperti muneris gratia, temptauit uehementior creatura insuetos senis artus, turbauit nona potio. |
| 7 | dormitauerunt inquit qui ascenderunt equos. |
| 8 | ascendit corporis uoluptates: et iustus obdormiuit. |
| 9 | sed illius ebrietas nobis suadet sobrietatem. |
| 10 | semel enim inebriatus est Noe; ubi uero malum ebrietatis agnouit, inuentum suum ad remedium temperauit, non effudit ad uitium. |
| 11 | unde apostolus ait: uino modico utere propter frequentes tuas infirmitates. |