Alcuinus, Vita S. Willibrodi, EIUSDEM ALCUINI HOMILIA, DE NATALI..., II.
| 1 | Sancti Willibrordi labores apostolici. |
| 2 | - Nobis vero sanctissimi Willibrordi non infima perdonavit auxilia, sed praeclara et gloriosa contulit suffragia. |
| 3 | Gaudeamus, dilectissimi fratres, in Domino, et spirituali iucunditate laetemur, qui nobis talem vitae perdonavit doctorem, iustitiae praeceptorem, unanimitatis nostrae auctorem; qui nos in hoc sacratissimum ovile congregavit et pietatis magisterio erudivit. |
| 4 | Gaudeat et nobiscum omnis populus, qui ad natalitia sanctissimi Patris hodie concurrit, et vigiliis apostolici viri pia devotione interesse studuit, et in praesentia Domini nostri Iesu Christi, et sanctorum angelorum, et beatissimi pontificis stare satagebant. |
| 5 | Nullus, obsecro, dubitet in fide, nec de veniae largitione haesitet, nec de piae petitionis fructu et effectu, qui nobis talem concessit patronum. |
| 6 | Illius nos precibus concedit exaudiri, quia quanto fiducialius deprecamur, tanto citius exaudiemur. |
| 7 | Fide enim omnia impetrantur, sicuti huius viri sanctissimi, cuius hodie festivum celebramus diem, certissima ante oculos habemus exempla, qui mox ab infantia sua, per fidem Deo placere contendit. |
| 8 | Nam patriam, cognationem et amicos, fervente fide, pro amore Dei dereliquit, terrena contempsit, ut coelestia acquireret. |
| 9 | Idcirco magnum laboris sui fructum invenit, et multas populorum turbas ad Christum convertit: et plurimos paganorum ab erroris iniquitate avertit, et divina cooperante gratia, filios irae, filios fecit esse misericordiae. |
| 10 | Inferna conclusit, coelum aperit, plurimas peragravit gentes, ut omnes in viam veritatis adduceret: nec sibi ipsi pepercit; populos adivit feroces, si forte purpureas martyrii coronas inveniret: quem Deus ob multorum servavit salutem, quatenus maiori praedicationis gloria honoraretur, quam si solus martyrio coronaretur. |
| 11 | In pace quievit, quia in spe laboravit. |
| 12 | Vitam invenit aeternam, quia temporalem reliquit; nobis ablatus, angelis sociatus. |