Alcuinus, Vita S. Willibrodi, LIBER PRIMUS., CAP. XXIV
| 1 | [Mab. XXVI]. |
| 2 | Anima ab angelis in coelum portatur. |
| 3 | Miracula ad viri sancti corpus. |
| 4 | - Sed et cuidam religioso sancti viri discipulo longius posito, in oratione vigilanti, obitus illius revelatus est. |
| 5 | Nam vidisse se testabatur animam sanctissimi Patris sui cum magna luminis claritate, cum consona canentium laude, ab angelicis exercitibus ad coelorum regna portari. |
| 6 | Multi quoque fratrum testati sunt, crebro se super lectulum, in quo beatam animam suo Creatori reddidit, mirabile vidisse lumen, suavissimamque odoris dulcissimi sensisse fragrantiam: ut omnino his signis crederetur, coelestes locum frequentasse [Mab., frequentare] cives, in quo sancta anima migravit ad Dominum [Mab., ad Christum]. (Mab. CAP. XXVII.) Per unctionem quoque olei, quod supra corpus sancti lucere solebat, multi infirmi, Deo donante et fidei illorum cooperante, curati sunt. |
| 7 | Poenitentes quoque saepius ad eamdem venientes ecclesiam, circulis ferreis more solito circumdati, ruptis circulis subito vincula sua resoluta senserunt [Mab., Poenitentibus, etc., vincula resoluta sunt]. |
| 8 | Cuius rei, adhuc in ecclesia circuli pendentes, testes sunt. |
| 9 | CAP. XXV [Mab. XXVIII]. |
| 10 | Paralytica sanatur. |
| 11 | - Quaedam vero mulier paralytica, septem annis [Mab., pluribus annis] magnis cruciata doloribus, in tantum grassante eadem quotidiana infirmitate afflicta est, ut omni membrorum officio destituta, alieno uteretur ministerio, et in solo tantummodo pectusculo vix anhelans spiritus suspiria fessa retraheret. |
| 12 | Haec a propinquis ad ecclesiam, ubi sanctus Dei requiescit, ferebatur, prope locellum reliquiarum eius posita. Quae [Mab., positaque] in eodem loco fusis lacrymis, deprecata est per intercessionem sancti sui famuli, divinam ei misereri clementiam [Mab., ut divina ei suffragaretur clementia]: atque a Domino Deo exaudita, moxque ab omni infirmitate liberata, sospes cum gaudio gratias agens Deo, propriis pedibus, quae prius ab alienis portabatur, cucurrit ad domum. |