Alcuinus, Vita S. Willibrodi, LIBER PRIMUS., CAP. XXI
| 1 | [Mab. XXII]. |
| 2 | Malignus spiritus per aquam benedictam a domo pellitur. |
| 3 | - Contigit cuidam patrifamilias et domui suae dira daemoniacae illusionis tentatio, ita ut aperte malignus in eius domo spiritus ex horrore et maleficiis habitare agnosceretur. |
| 4 | Nam subito cibos, vel vestimenta, vel alia domui necessaria rapere solebat, et in ignem mittere. |
| 5 | [Mab. mittebat]. |
| 6 | Quin etiam parvulum, inter amplexus parentum pausantem, illis dormientibus, tulit et in ignem proiecit. |
| 7 | Sed vagitu infantis parentes excitati [Mab. suscitati], vix parvulum de incendio eruerunt, et multa atrocia eadem familia a nefando spiritu perpessa est: nec a quolibet presbyterorum expelli [Mab., depelli] potuit, donec vir sanctus Willibrordus, a patrefamilias postulatus, aquam illis benedictam direxit, praecipiens omnem domus illius supellectilem foras efferre, et aqua illa aspergi, praevidens in spiritu domum flammis consumendam esse. |
| 8 | Quibus ita gestis, vacuam domum a loco lectuli ignis invasit, totamque consumpsit. |
| 9 | Altera vero in eo loco cum sanctificatione aquae benedictae aedificata, nihil exinde pristinae tentationis passi sunt in ea: sed cum omni tranquillitate et quiete degentes, et Domino gratias agentes erant, qui illos per servum suum redimere dignatus est. |