Alcuinus, Vita S. Willibrodi, LIBER PRIMUS., CAP. XVI
| 1 | [Mab. XVII]. |
| 2 | Vinum multiplicat. |
| 3 | - Iterum sanctus Dei sacerdos, in quodam loco iter agens, vidit mendicantes inopes duodecim, pariter postulantes sibi aliquid a praetereuntibus solatii [dari]. |
| 4 | Quos, ut erat mitissimus, benigno aspexit animo, unique ex suis mandavit specialem suum flasconem sumere, ac pauperibus miscere [Miscere pro fundere] Christi. |
| 5 | Ex quo omnes illi duodecim usque ad satietatem bibebant: et mirum in modum, illis abeuntibus, ex optimo vino flasco, de quo tanti biberant homines, [a ministro] inventus est plenus, ut ante. |
| 6 | Hoc comperto, benedicebant omnes Dominum Deum nostrum [Mab., Dominum Iesum], dicentes: Vere impletum est in nobis, quod in Evangelio dicitur: Date, et dabitur vobis (Luc. VI, 38). |