Alcuinus, Vita S. Vedasti, 6, III.
| 1 | Iste sanctus, ad cuius concurrere festa voluistis, pro multorum laboravit salute, ideo plurimorum praemia in die iudicii suscepturus erit. |
| 2 | Seipsum per abstinentiae maceravit rigorem, aliis praedicationis profuit sedulitate, ideo laudabilis omnibus exstat, iuxta vocem sapientissimi Salomonis: Memoria iusti cum laudibus, et nomen impiorum putrescet (Prov. X, 7). |
| 3 | Dum vita iustorum laudatur, iniquitas impiorum quasi stercus detestatur ab omnibus. |
| 4 | Quid est felicius quam in bona conversatione a Deo perpetuae promereri beatitudinis gloriam, et omnium ore laudari? |
| 5 | Cogitemus quotidie, qua fiducia veniamus ante tribunal summi iudicis, quid boni operis nobiscum deferamus. |
| 6 | Aequitas illius nullius accipiet personam; sed unicuique reddet secundum opera sua: et qui plus laborat in opere Dei, plus mercedis accipiet in regno Dei. |
| 7 | Unusquisque in qua vocatione vocatus est, in ea viriliter suam operetur salutem. |
| 8 | Omnibus coelestis regni ianua patescit, sed meritorum qualitas alium introducit, alium expellit. |
| 9 | Quam miserum est hominem a gloria excludi sanctorum, et aeternis cum diabolo deputari flammis! |
| 10 | Peccatorum sarcina animam submergit in tartara: iustitiae abundantia ad coelestem evehit gloriam. |
| 11 | Frequentemus saepius ecclesiam Christi; audiamus in ea diligentius verba Dei; et quod aure percipimus, hoc corde retineamus, ut fructum boni operis feramus in patientia, et fraterno amore unusquisque alium adiuvare studeat. |
| 12 | Habemus praeclara sanctissimi Patris nostri abundanter exempla in omni charitatis officio, in fidei fervore, in spei longanimitate, in perseverantia totius bonitatis illius. |
| 13 | Quem tanta celebramus laude, et tanto diligimus amore, tota mentis intentione in omni conversatione sancta sequamur vestigia eius, quatenus viam vitae illius currentes aeternae beatitudinis cum illo gloriam accipere mereamur, auxiliante nos rege aeterno Domino nostro Iesu Christo, qui cum Patre et Spiritu sancto vivit et regnat Deus per omnia saecula saeculorum. |
| 14 | Amen. |