Alcuinus, Vita S. Martini Turonensis, EIUSDEM ALCUINI SERMO DE TRANSITU..., XV.
| 1 | Inter angelicos hymnos animam agit. |
| 2 | - Anno igitur aetatis suae LXXXI, et episcopatus sui XXVI, maturus annis et moribus apud Condatensem dioecesis suae vicum, ut diximus, feliciter recessit a saeculo. |
| 3 | Sed inter divina sacrae praedicationis verba, cum angelicis coelestium hymnorum vocibus, circumstantibus suis discipulis, gratia plenus et sanctitate, sanctam Iesu Christo tradidit animam. |
| 4 | Multi enim in eius transitu voces audierunt angelorum sanctum Martinum laudantium. |
| 5 | Quanta autem multitudo ad eius obsequium convenerit, narrari non potest. |
| 6 | Multi enim ex vicinis urbibus et monasteriis atque vicis cum lacrymis venerunt, una voce sanctum Martinum lugentes. |
| 7 | O quantus erat luctus omnium! quanta praecipue lamenta monachorum et virginum dicentium, quia pium est gaudere Martino, et pium est flere Martinum. |
| 8 | Pium enim erat eum vivere, pium erat et mori; quia in vita sua placuerat Deo. |