Alcuinus, Vita S. Martini Turonensis, De vita, V.
| 1 | In Gallias redit. |
| 2 | Cellam construit. |
| 3 | Tres mortuos resuscitat. |
| 4 | Puellam mutam sanat. |
| 5 | - Inde regressus obviam habuit malignum spiritum, qui sancto viro, quocunque pergeret, comitem se esse spopondit; cui intrepidus respondit: Dominus mihi adiutor est, non timebo minas tuas. |
| 6 | Sed multas Arianorum tribulationes sustinens, iterum Gallias repedavit, sanctoque Hilario Pictaviensi iunctus, prope civitatem sibi cellulam construxit, in qua liberius contemplativos carperet fructus. |
| 7 | Cui quidam catechumenus adhaerens subita, sancto absente viro, morte praereptus est: quem vir Dei precibus profusis resuscitavit, vitae redditum baptizavit, qui multis postea annis vixit. |
| 8 | Alterum quoque, in cuiusdam Lupicini agro laqueo suspensum, sacris orationibus vitae restituit. |
| 9 | Tertium ab eodem sancto viro, in Carnoteno oppido, cuiusdam mulieris flentem filium sola oratione in conspectu populi resuscitavit. |
| 10 | Quo miraculo viso, plurimi ex populo crediderunt Christo. |
| 11 | Succedente itidem tempore, in eodem oppido, mutam ab infantia puellam benedicti olei inunctione sanavit. |