| 4 | Sed inde [Al., exinde] Arianorum saevitia principum depulsus Gallicanas secessit in partes, venerabilique Pictaviensis urbis antistiti Hilario iunctus, qui tunc temporis quasi firmissima fidei columna omnibus laudabilis exstitit: et quasi [Forte, et sicut] Lucifer in coelo stellis clarior caeteris clarescit, ita ille sanctus vir in Ecclesia Christi, omnibus famae magnitudine, et sanctitate vitae, et doctrinarum veritate sanctarum excellentior effulsit: cuius disciplinis se sanctus Martinus, post relictum militiae cingulum, sociavit, ut tanti viri eruditus exemplis Christianam fortior processisset ad pugnam, fidei armatus galea, et lorica iustitiae accinctus, gladio verbi Dei armatus, intrepidus contra omnia tela maligni bellator muniretur. |