Alcuinus, Vita S. Martini Turonensis, De vita, II.
| 1 | S. viri patria et militia. |
| 2 | Christi militiam sequi amat. |
| 3 | Catechumenus pauperem vestit. |
| 4 | - Igitur beatissimus vir, paganis parentibus in regione Pannoniae, Sabariae oppido, genitus est; sed intra Ticinum Italiae nutritus, militiaeque cingulo, a praeside [Al., a perfido] Iuliano, iuxta parentum suorum nobilitatem, est addictus. |
| 5 | Sed vir sanctus magis elegit Deo coelesti servire, quam sub imperatore militare terreno; qui specialiter electus est, ut vexillum sanctae crucis occiduas orbis portaret in partes, et militiae sacramenta evangelicis mutaret edictis: non pro regno armis saecularibus certare Romano, sed specialibus doctrinis Christianum dilatare imperium; nec dura Romanorum lege populos subiicere feroces, sed leve Christi iugum plurimarum collo iniicere gentium. |
| 6 | Qui post sacri baptismatis mysterium magnis in mundo claruit miraculis, et doctrinis longe lateque resplenduit in orbe; cuius haec prima leguntur insignia. |
| 7 | Cum adhuc catechumenus esset, hiemali frigore, media suae chlamydis pauperem parte vestivit. |
| 8 | Qua etiam parte chlamydis suae, inter angelicos exercitus Dominum Iesum, divinitus illuminatus, nocte sequente, vestitum aspexit; ut verum intelligeret quod ipse Dominus Iesus evangelicis intonat paginis: Quandiu fecistis uni ex his minimis meis, mihi fecistis (Matth., XXV, 40). |