| 1 | A solis ortus cardine Ad usque terrae limitem, Christum canamus principem Natum Maria virgine. |
| 2 | Beatus auctor saeculi Servile corpus induit, Ut carne carnem liberans Ne perderet quos [Al., quod] condidit. |
| 3 | Clausae [Al., clausa] parentis viscera Coelestis intrat gratia: Venter puellae baiulat Secreta quae non noverat. |
| 4 | Domus pudici corporis [Al., pectoris] Templum repente fit Dei: Intacta nesciens virum Verbo concepit Filium. |
| 5 | Enixa est puerpera [Al., Enixa iam puerpera est] Quem Gabriel praedixerat: Quem matris alvo gestiens Clausus Ioannes senserat. |
| 6 | Feno iacere pertulit, Praesepe non abhorruit: Parvoque lacte pastus est, Per quem nec ales esurit. |
| 7 | Gaudet chorus coelestium, Et angeli canunt Deo: Palamque fit pastoribus Pastor Creator omnium. |
| 8 | Hostis Herodes impie, Christum venire quid times? Non eripit [Al., non abripit] mortalia, Qui regna dat coelestia. |
| 9 | Ibant Magi, qua venerant [Al., quam viderant] Stellam sequentes praeviam: Lumen requirunt munere [Al., lumine], Deum fatentur munere. |
| 10 | Katerva matrum personat Collisa deflens pignora: Quorum tyrannus millia Christo sacravit victima [Al., victimam]. |
| 11 | Lavacra puri gurgitis Coelestis Agnus attigit: Peccata quae non detulit Nos obluendo sustulit. |
| 12 | Miraculis dedit fidem Habere secundum Patrem [Al., Habere se Deum Patrem]: Infirma sanans corpora, Et suscitans [Al., resuscitans] cadavera. |
| 13 | Novum genus potentiae Aqua [Al., aquae] rubescunt hydriae: Vinumque iussa fundere Mutavit unda originem. |
| 14 | Orat salutem servulo Nixus [Al., Flexus] genu Centurio: Credentis ardor plurimus Exstinxit ignes febrium. |
| 15 | Petrus per undas ambulat [Al., ambulans] Christi levatus [Al., levatur] dextera: Natura quam negaverat, Fides paravit semitam. |
| 16 | Quarta die iam fetidus Vitam recepit Lazarus: Mortisque liber [Al., Cunctisque liber] vinculis Factus est superstes sibi. |
| 17 | Rivos cruoris torridi [Al., horridi] Contacta vestis obstruit: Fletu rigantis [Al., rigante] supplicis Clausit fluenta [Al., Arent fluentia] sanguinis. |
| 18 | Solutus omni languore [Al., omni corpore] Iussus repente surgere, Suis vicissim gressibus Aeger vehebat lectulum. |
| 19 | Tunc ille Iudas carnifex Ausus Magistrum tradere, Pacem ferebat osculo Quam non habebat pectore. |
| 20 | Verax datur fallacibus, Pium flagellat impius: Crucique fixus innocens Coniunctus est [Al., coniungitur] latronibus. |
| 21 | Xyro [Al., Xero; forte leg. Xro, id est Christo] myrrham post sabbatum Quaedam vehebant compares [Al., corpori], Quas allocutus angelus: Vivum sepulcrum non tegit [Al., vivum sepulcro non tegi]. |
| 22 | Ymnis venite dulcibus Omnes canamus subditum Christi triumpho tartarum, Qui nos [Al., qui vos] redemit venditos. |
| 23 | Zelum draconis invidi Et os leonis pessimi, Calcavit unicus Dei, Sese qui [Al., seseque] coelis reddidit. |
| 24 | Gloria Patri ingenito, Gloria Unigenito, Una cum sancto Spiritu In sempiterna saecula. |