Alcuinus, Officia per ferias, ORATIO PRO OMNI POPULO, ORATIO PRO OMNI POPULO, Ut in regum continetur historia.
| 1 | Parce, Domine, parce populo tuo, quem redemisti, Christe, sanguine tuo; ut non in aeternum irascaris nobis. |
| 2 | Deprecamur, Domine, in omni misericordia tua, ut auferatur furor tuus et ira tua a loco isto, et a domo sancta tua, quoniam peccavimus. |
| 3 | Peccavimus tibi, Domine, et tu iratus es nobis, et non est, qui effugiat manus tuas: sed supplicamus, ut veniat misericordia tua super nos, qui Ninivae pepercisti. |
| 4 | Invocantes Dominum exclamemus, ut respiciat populum conculcatum et dolentem: protegat templum sanctum suum, ne ab impiis contaminetur, sed misereatur nobis. |
| 5 | Exclamemus omnes ad Dominum dicentes: Peccavimus tibi, Domine, patientiam habe in nobis, et erue nos a malis istis, quae quotidie accrescunt super nos. |
| 6 | Dimitte, Domine, peccata populi tui, secundum multitudinem misericordiae tuae, sicut propitius fuisti patribus nostris. |
| 7 | Propitius esto nobis, et impleatur gloria tua universa terra. |
| 8 | Recordare, Domine, dic angelo percutienti: Sufficit, contine manum tuam, et cesset interfectio quae grassatur in populo, et ne perdas omnem animam viventem. |
| 9 | Exsurge, Domine, adiuva nos et libera nos propter nomen tuum. |