Alcuinus, Officia per ferias, ORATIO SANCTI ISIDORI.
| 1 | Succurre mihi, Deus meus, antequam mors veniat, antequam mors me perimat, antequam tartarus rapiat, antequam flamma comburat, antequam tenebrae me involvant, antequam sine fine deficiam. |
| 2 | Subveni mihi Deus meus, priusquam gehenna ignis devorer, priusquam sine termino crucier. |
| 3 | Vae mihi misero homini, omni polluto contagio! Vae mihi peccatori omnium pessimo! Vae mihi, qui factus sum sentina omnium criminum! Heu mihi, qui superavi omnem magnitudinem peccatorum! Heu mihi, cuius iniquitas excrevit omnem magnitudinem delictorum! Obsecro vos, omnes sancti, miseriis meis subvenite, perditionem meam plangite. |
| 4 | Flete me miserum et proiectum. |
| 5 | Flete me mortuum et abominatum. |
| 6 | Flete me, coelum et terra. |
| 7 | Plorate me, omnia elementa. |
| 8 | Ingemisce me, omne genus humanum. |
| 9 | Sumite super me lamentum, veniam pro me lacrymis impetrate, et preces pro me impio fundite, terram lacrymis irrigate. |
| 10 | Plenus sum sceleribus, plenus sum vitiis omnibus: vas iniquitatis ego sum. |
| 11 | Per omnia membra mea scelerum insignia agnoscuntur. |
| 12 | Nihil est, quod iustitiae reservaverim, totum impietati me tradidi. |
| 13 | Omne vitium, quod destinavi in carne, perfeci in opere. |
| 14 | Omne crimen, quod cogitavi, complevi. |
| 15 | Omnem pravam cogitationem ad studium perficiendi deduxi. |
| 16 | Hinc est quod inter homines confusus, in coelum oculos erigere non valeo. |
| 17 | In vultu enim meo ignominiam porto. |
| 18 | In omnibus actibus meis erubesco. |
| 19 | Faciem meam conscientiae reatus inclinat. |
| 20 | Confusio operis mei ante oculos versatur. |
| 21 | Corde meo deprehensus ubique confundor: non audeo quempiam fiducialiter intueri. |
| 22 | Fidem enim perdidi, pietatem contaminavi, sanctitatem pollui, religionem vitiis impiavi. |
| 23 | Divina omnia atque humana iura violavi. |
| 24 | In omne fas nefasque properavi. |
| 25 | Miserere mei, Domine, miserere mei, qui regnas. |