Alcuinus, Officia per ferias, ITEM EIUSDEM.
| 1 | Quo fletu mala mea flere incipiam, quibus lacrymis facinora mea lugeam, quibus fletibus angustias meas plangam? Peccata mea mihi sensum doloris tulerunt. |
| 2 | O lacrymae! ubi vos subduxistis? ubi estis fontes lacrymarum? ubi es moeroris unda? ubi estis lamenta? quo fugistis fletus? quo abiistis ploratus? Redite, obsecro vos, in nomine Domini nostri Iesu Christi; redite, progredimini, et oculos meos replete lacrymis. |
| 3 | Novemini fontes lacrymarum, aspergite me fletibus, fluite super faciem meam, humectate maxillas meas, genas meas irrigate. |
| 4 | Date mihi planctum anxium et amarum. |
| 5 | Ego enim infelix et miser flendus ac miserandus, infelicissimus omnium atque miserrimus foeditatem meam conspicio, meumque reatum agnosco. |
| 6 | Scio me esse peccatorem, et quam turpis sum video. |
| 7 | Iniquum me esse reprehendo, impium me esse accuso. |
| 8 | Rogo te, Domine, ut ignoscas mihi; ego agnosco iniquitatem meam. |
| 9 | Inter omnes enim gravius corrui, inter omnes deterius cecidi, inter omnes plus peccato subiacui, plus caeteris carnali delectationi succubui. |
| 10 | Cunctos carnales squalore luxuriae superavi, omniumque impiorum mala scelere meo vici: ita ut tormenta tartarea vix malis meis sufficiant. |
| 11 | Non est enim peccatum super peccatum meum, non est iniquitas super iniquitatem meam. |
| 12 | Et nunc summae clementiae Deus, quoniam delicta mea cognita tibi facio, et in iustitiam meam non abscondo; misericordiam tuam deprecor, misericordiam tuam imploro. |
| 13 | Tuam imploro miserationem, tuam quaeso clementiam; dele mea peccata, ablue facinora mea. |
| 14 | Peccatorum meorum maculas munda, labem criminum meorum purga, sordes delictorum meorum absterge, sordes iniquitatum mearum ablue. |
| 15 | Non differas mundationem meam Deus. |
| 16 | Totum me tibi sanandum offero, recipiat salutem anima mea. |
| 17 | Da vulneri meo salutem. |
| 18 | Deus, languoribus meis medelam tribue, post plagas vulnerum redde incolumem. |
| 19 | Vulneratus sum, medicum quaero. |
| 20 | Languidus sum, medelam posco. |
| 21 | Consumpta est caro mea, contabuit species mea. |
| 22 | Ossa mea exaruerunt, membra mea contabuerunt. |
| 23 | Appropinquavi corruptioni, umbra mortis comprehendit me. |
| 24 | Tenebrae operuerunt me, caligo inferni involvit me. |
| 25 | Oppressit me tenebrarum horror. |
| 26 | Doce me facere voluntatem tuam, quia Deus meus es tu. |
| 27 | Tibi honor, et gloria, et virtus, et potestas in saecula saeculorum. |
| 28 | Amen. |