Alcuinus, Officia per ferias, ORATIO SANCTI HIERONYMI.
| 1 | Ego te, Domine Iesu Christe, vere credo, verum fateor; quia vere redemisti nos: vere, quia vivificasti nos; verum, quia salvasti nos. |
| 2 | Tu fortior forte, victor in praelio, praeparator vitae. |
| 3 | Tu resurrectio mortuorum. |
| 4 | Tua sumus vasa, tu noster figulus. |
| 5 | Rogamus te, Domine, ut vacua spiritu tuo impleas, plena conserves. |
| 6 | Te in Patre credimus: Patrem similiter in te confitemur, Spiritum quoque sanctum in utroque veneramur. |
| 7 | Trinum Deum colimus in personis, unum in substantia deitatis. |
| 8 | Munda me, Domine, vas tuum, et sanctifica, quod fecisti: de malitia evacua, et imple de gratia. |
| 9 | Praesta mihi, ut fraternam semper teneam charitatem: mala obliviscar, aliena non requiram. |
| 10 | Te solum creaturarum omnium, qui unus et verus es, semper diligam Creatorem, qui mortificas et vivificas, deducis ad inferos et reducis, in Trinitate semper permanens in saecula saeculorum. |