Alcuinus, Officia per ferias, ORATIO SANCTI HIERONYMI PRESBYTERI.
| 1 | Domine Iesu Christe, qui me dignatus fuisti creare ad imaginem tuam, et redimere de tuo pretioso sanguine: qui intra matris viscera, mea membra compaginasti, et ad istius vitae lucem perduxisti. |
| 2 | Precor dulcissimam pietatem tuam, ut me tuo coelesti lumine illuminare digneris, et vias paradisi mihi ostendas, et ad portum salutis aeternae perducas. |
| 3 | Domine misericordissime, dignare in me accendere ignem amoris tui, qui peccata mea consumat, et ad tuum desiderium semper accendat; et habitet Spiritus sanctus in corde meo, qui me doceat facere voluntates tuas. |
| 4 | Domine piissime Pater, mollifica cor meum durum et lapideum. |
| 5 | Largire mihi compunctionem cordis, ut de reatu peccatorum meorum profusas lacrymas ante clementiam tuam fundam. |
| 6 | Concede mihi, Domine, lacrymas Mariae, quae pedes tuos unguento unxit, lacrymis rigavit, et crine tersit. |
| 7 | Concede mihi fidem latronis, qui in cruce positus te confessus est, dicens: Memento mei, Domine, cum veneris in regnum tuum (Luc. XXIII, 42); et audire meruit: Amen dico tibi, hodie mecum eris in paradiso (Ibid., v. 43). |
| 8 | Praesta mihi, omnipotens Deus, ut in illa die qua iusseris animam meam a corpore separari, piam sententiam merear audire, et angeli sancti perducant animam meam ad gaudia iustorum. |
| 9 | Angeli vero iniqui tristes abscedant a me. |
| 10 | Dirigatur ad te, Domine, oratio mea, sicut incensum in conspectu tuo. |
| 11 | Exaudi, Domine, vocem meam, qua clamavi ad te, miserere mei et exaudi me. |
| 12 | Domine, exaudi orationem meam, et clamor meus ad te veniat. |