Alcuinus, Officia per ferias, ITEM SABBATO IN HONORE OMNIUM SANCTORUM ORATIO SANCTI GREGORII PAPAE.
| 1 | Deus omnipotens Pater et Filius et Spiritus sanctus, unica Trinitas in tribus personis, qui es idem et qui eras, et qui venturus es. |
| 2 | Libera me, Domine, ab omnibus peccatis meis et ista mortalitate, et a morte poenae, a planta usque ad verticem, intus et foris. |
| 3 | Intercedite pro me sancta cherubim, sancta seraphim, sancti throni, sanctae dominationes, sancti principatus, sanctae potestates, sanctae virtutes, sancti angeli, sancti archangeli. |
| 4 | Sancte Gabriel, sancte Michael, sancte Raphael, orate pro me. |
| 5 | Intercedite pro me, sancti patriarchae, sancti duces, sancti iudices, sancti sacerdotes, sancti prophetae, sancti reges, sancti Machabaei, sancti Infantes. |
| 6 | Intercedite pro me nativitas Christi, Christi circumcisio, Christi baptisma, Christi operatio, Christi virtutes, Christi doctrina, Christi crux, Christi anima, Christi caro, Christi resurrectio, Christi descensio, Christi ascensio. |
| 7 | Sancta Maria, sancti apostoli, sancti discipuli, sancti successores, sancti baptistae, sancti principes, sancti episcopi, sancti presbyteri, sancti diaconi, sancti subdiaconi, sancti lectores, sancti exorcistae, sancti martyres, sancti confessores, sancti anachoretae, sancti monachi, sancti clerici, sancti laici, sanctae virgines, sanctae uxores, sancti domini, sancti servi, sancti divites, sancti pauperes, sancti doctores, sancti fratres, sanctae sorores. |
| 8 | Horum omnium generaliter nomina, et memoriae, et spiritus, et animae, et sanctae cogitationes, et sancta verba, et sancta opera, et merita in coelis, et reliquiae in terris, et divitiae bonitatis Dei, et longanimitatis, et patientiae, et misericordiae: haec omnia in nomine Domini nostri Iesu Christi, sint scuta, sint galeae, sint sanitates, sint suffragia, sint loricae animae meae, et spiritus mei, et corporis mei cum omnibus personis meis intus et foris, a planta usque ad verticem: visui, auditui, odoratui, gustui, tactui, carni et sanguini cum omnibus ossibus, et nervis, et visceribus meis, venis, medullis, compagibus, artubus meis, cuti, meatibus meis. |
| 9 | Per te enim, Iesu Christe, omnia vivificantur, et inspirantur, et mutantur, et sana sunt. |
| 10 | Protege me, Domine, a dextris et a sinistris, ante et retro, subtus et supra, in aere, in terra, in aquis, in mari, in flexu, in erectione, in gressu, in sede, in stando, in ambulando, in vigilando, in dormiendo, in loco, in omni hora, in omni die, in omni nocte, in omni vita. |
| 11 | Adiuva me, custodi me, Trinitas sancta, omnipotens Deus. |
| 12 | Libera me, Domine, ab omni malo praeterito, praesenti et futuro: de periculis terrae, et maris, et omnium bestiarum, et phantasmatum, et volucrum, et quadrupedum, et serpentium. |
| 13 | Defende me ab igne et fulgure, a tonitruo, a grandine, a nive, a pluvia, a ventis, a hiatu terrae, a turbine, a terrae motu, ab omnibus hominibus malis, a veneficiis, ab invidis oculis. |
| 14 | Ego confiteor impietatem peccati mei: peccator enim sum, et de peccato natus. |
| 15 | Tu autem verus Deus omnipotens sine peccato. |
| 16 | Rogo Patrem per Filium. |
| 17 | Rogo Filium per Patrem. |
| 18 | Rogo Spiritum sanctum per Patrem et Filium, ut et omnia vitia elongentur a me, et omnes sanctae virtutes plantentur in me. |
| 19 | Deus immense, a quo omnia, per quem omnia sunt: in quo omnia facta sunt, visibilia et invisibilia, supra tegens, et infra ferens, opera tua extra circumdans, intra replens. |
| 20 | Custodi me, Domine, creaturam tuam usque in sempiternum. |
| 21 | Hos omnes invoco in auxilium meum. |
| 22 | Per. |