| 1 | Pange, lingua, gloriosi Praelium certaminis, Et super crucis trophaeo Da triumphum nobilem; Qualiter Redemptor orbis Immolatus vicerit. |
| 2 | De parentis protoplasti Fraude factor condolens, Quando pomi noxialis Morte morsu corruit: Ipse ligno tunc notavit, Damna ligni ut solveret. |
| 3 | Hoc opus nostrae salutis Ordo depoposcerat, Multiformis perditoris Arte ut artem falleret; Et medelam ferret inde Hostis unde laeserat. |
| 4 | Quando venit ergo sacri Plenitudo temporis, Missus est ab arce Patris Natus orbis Conditor, Atque ventre virginali Caro factus prodiit. |
| 5 | Vagit infans inter arcta Conditus praesepia, Membra pannis involuta Virgo mater alligat, Et pedes, manusque, crura Stricta pangit [Al., cingit] fascia. |
| 6 | Lustra sex qui iam peracta Tempus implens corporis, Se volente, natus ad hoc Passioni deditus, Agnus in crucis levatur Immolandus stipite. |
| 7 | Hic acetum, fel, arundo, Sputa, clavi, lancea, Mite corpus perforatur Sanguis unda profluit: Terra, pontus, astra, mundus, Quo lavantur flumine. |
| 8 | Crux fidelis inter omnes Arbor una nobilis, Nulla talem silva profert Fronde, flore, germine; Dulce lignum, dulcem clavum [Al., dulces clavos] Dulce pondus sustinens. |
| 9 | Flecte ramos arbor alta, Tensa laxa viscera, Et rigor lentescat ille, Quem dedit nativitas, Ut superni membra Regis Mittenda [L., mitti tendas] stipite. |
| 10 | Sola digna tu fuisti Ferre pretium seculi, Atque portum praeparare Nauta mundo naufrago: Quam sacer cruor perunxit Fusus agni stipite [L., agni corpore]. |