Alcuinus, Officia per ferias, DEPRECATIO Quam papa Gelasius pro universali Ecclesia constituit canendam esse.
| 1 | Dicamus omnes, Domine, exaudi et miserere. |
| 2 | Patrem unigeniti, et Dei Filium genitoris ingeniti, et sanctum Deum Spiritum fidelibus animis invocamus. |
| 3 | Pro immaculata Dei vivi Ecclesia, sacerdotibus ac ministris, divinam bonitatis opulentiam deprecamur. |
| 4 | Pro sanctis Dei magni sacerdotibus et ministris, cunctisque Deum verum colentibus populis, Christum Dominum supplicamus. |
| 5 | Pro universis recte tractantibus verbum veritatis, multiformem Verbi Dei sapientiam peculiariter obsecramus. |
| 6 | Pro his, qui se mente et corpore propter coelorum regna castificant, et spiritualium labore desudant, largitorem spiritalium munerum obsecramus. |
| 7 | Pro religiosis principibus, omnique militia eorum, qui iudicium et iustitiam diligunt, Domini potentiam obsecramus. |
| 8 | Pro iucunditate et serenitate pluviae, atque aurarum vitalium blandimentis, ac prospero diversorum operum cursu, rectorem mundi Dominum deprecamur. |
| 9 | Pro his, quos prima Christiani nominis initiavit agnitio, quos iam desiderium gratiae coelestis accendit, omnipotentis Dei misericordiam obsecramus. |
| 10 | Pro his, quos humanae infirmitatis fragilitas, et quos nequitiae spiritalis invidia, vel varius saeculi horror involvit, Redemptoris nostri misericordiam imploramus. |
| 11 | Pro his, quos peregrinationis necessitas, aut iniquae potestatis impietas, vel hostilis vexat aerumna, Salvatorem Dominum supplicamus. |
| 12 | Pro iudaica falsitate, aut haeretica pravitate deceptis, vel gentilium superstitione perfusis, veritatis Dominum deprecamur. |
| 13 | Pro operariis pietatis, et his qui necessitatibus laborantum fraterna charitate subveniunt, misericordiam Dominum deprecamur. |
| 14 | Pro omnibus intrantibus in haec sanctae domus Dei atria religioso corde, et supplici devotione convenienter Dominum gloriae deprecamur. |
| 15 | Pro emundatione animarum corporumque nostrorum omnium, ac venia peccatorum, clementissimum Dominum supplicamus. |
| 16 | Pro refrigerio fidelium animarum, praecipue sanctorum Domini sacerdotum, qui huic Ecclesiae praefuerunt catholicae, Dominum spirituum, et universae carnis iudicem deprecamur. |
| 17 | Mortificatam vitiis carnem, et viventem fide animam praesta, Domine, praesta. |
| 18 | Castum timorem, et veram dilectionem praesta, Domine, praesta. |
| 19 | Gratum vitae ordinem, et probabilem exitum praesta, Domine, praesta. |
| 20 | Angelum pacis, et solatia sanctorum praesta, Domine, praesta. |
| 21 | Nosmetipsos, et omnia nostra, quae orta, quae acta, per Dominum ipso auctore suscepimus, ipso custode retinemus, ipsiusque misericordiae et arbitrio providentiae commendamus. |
| 22 | Domine, miserere. |