Alcuinus, Officia per ferias, PSALMUS.
| 1 | (PSAL. XIX.) Exaudiat te Dominus in die tribulationis: protegat te nomen Dei Iacob. |
| 2 | Mittat tibi auxilium de sancto: et de Sion tueatur te. |
| 3 | Memor sit omnis sacrificii tui: et holocaustum tuum pingue fiat. |
| 4 | Tribuat tibi secundum cor tuum: et omne consilium tuum confirmet. |
| 5 | Laetabimur in salutari tuo: et in nomine Dei nostri magnificabimur. |
| 6 | Impleat Dominus omnes petitiones tuas: nunc cognovi quoniam salvum fecit Dominus Christum suum. |
| 7 | Exaudiet illum de coelo sancto suo in potentatibus salus dexterae eius. |
| 8 | Hi in curribus, et hi in equis: nos autem in nomine Domini Dei nostri invocabimus. |
| 9 | Ipsi obligati sunt et ceciderunt: nos autem surreximus et erecti sumus. |
| 10 | Domine, salvum fac regem: et exaudi nos in die, qua invocaverimus te. |
| 11 | Ut supra. |
| 12 | Fiat misericordia tua, Domine, super nos. |
| 13 | Oratio. |
| 14 | Imple, Domine, petitiones nostras, et tanquam pinguissimum nos holocaustum assume, ut inimicorum curribus obligatis, salutaris tui opitulatione laetemur. |
| 15 | Per. |
| 16 | Alia Oratio. |
| 17 | Imple, Domine, petitiones nostras, et mitte nobis auxilium de sancto: memor esto sacrificii nostri, quod tibi non solum oblatione et oratione offertur, ac preces nostras, quas in quacunque die tibi tam manu linguae, quam genu cordis offerimus, propitius audire dignare. |
| 18 | Per. |