Alcuinus, Officia per ferias, GRATIARUM ACTIO.
| 1 | Tibi ago laudes et gratias, Deus meus, misericordia mea, qui me ad tuam cognitionem perducere, et per sacri me baptismatis ablutionem inter adoptionis tuae filios aggregare dignatus es. |
| 2 | Tibi ago laudes et gratias, qui me ab ipsis rudimentis infantiae usque ad hanc horam per multa defluentem vitia, immensae bonitatis tuae patientia ad emendationem exspectas. |
| 3 | Te laudo et glorifico, qui me saepissime de multis tribulationibus et angustiis, calamitatibus et miseriis liberasti, qui me hactenus de aeternis suppliciis, de corporis huius cruciatibus exemisti. |
| 4 | Te laudo et glorifico, qui mihi sospitatem membrorum, tranquillitatem temporum, et honorem, affectum et charitatem: si qua etiam dona sunt in me tuae pietatis, conferre dignatus es. |
| 5 | Quaeso, Domine Deus, inaestimabilem suavitatis tuae clementiam; ut inchoata in me bona perficias. |
| 6 | Quidquid in me tibi displicet, repellas; a cunctis me, quae supersunt, tribulationibus, iniquitatibus ac diversis malis eripias. |
| 7 | Cogitationes meas, locutiones pariter et actus in tua voluntate dirigas; et ne auferas animam meam de hoc mundo, priusquam emendari studeat in tua voluntate. |
| 8 | Inter adversa me et prospera gradientem semper et ubique custodias: et ad tuae me visionis iterata gaudia quandoque perducas. |
| 9 | Amen. |