Alcuinus, Officia per ferias, PSALMUS.
| 1 | (PSAL. CXLIV.) Exaltabo te, Deus meus rex: et benedicam nomini tuo in saeculum, et in saeculum saeculi. |
| 2 | Per singulos dies benedicam tibi: et laudabo nomen tuum in saeculum, et in saeculum saeculi. |
| 3 | Magnus Dominus et laudabilis nimis, et magnitudinis eius non est finis. |
| 4 | Generatio et generatio laudabit opera tua: et potentiam tuam pronuntiabunt. |
| 5 | Magnificentiam gloriae sanctitatis tuae loquentur: et mirabilia tua narrabunt. |
| 6 | Et virtutem terribilium tuorum dicent: et magnitudinem tuam narrabunt. |
| 7 | Memoriam abundantiae suavitatis tuae eructabunt: et in iustitia tua exsultabunt. |
| 8 | Miserator et misericors Dominus, patiens et multum misericors. |
| 9 | Suavis Dominus universis: et miserationes eius super omnia opera eius. |
| 10 | Confiteantur tibi, Domine, omnia opera tua et sancti tui benedicant tibi. |
| 11 | Gloriam regni tui dicent: et potentiam tuam loquentur. |
| 12 | Ut notam faciant filiis hominum potentiam tuam et gloriam magnificentiae regni tui. |
| 13 | Regnum tuum regnum omnium saeculorum: et dominatio tua in omni generatione et generationem. |
| 14 | Fidelis Dominus in omnibus verbis suis: et sanctus in omnibus operibus suis. |
| 15 | Allevat Dominus omnes, qui corruunt, et erigit omnes elisos. |
| 16 | Oculi omnium in te sperant, Domine: et tu das escam illorum in tempore opportuno. |
| 17 | Aperis tu manum tuam: et imples omne animal benedictione. |
| 18 | Iustus Dominus in omnibus viis suis: et sanctus in omnibus operibus suis. |
| 19 | Prope est Dominus omnibus invocantibus eum: omnibus invocantibus eum in veritate. |
| 20 | Voluntatem timentium se faciet, et deprecationem eorum exaudiet: et salvos faciet eos. |
| 21 | Custodit Dominus omnes diligentes se: et omnes peccatores disperdet. |
| 22 | Laudationem Domini loquetur os meum: et benedicat omnis caro nomini sancto eius in saeculum, et in saeculum saeculi. |
| 23 | Ut supra. |
| 24 | Misit de summo, et accepit me: assumpsit me de aquis multis. |
| 25 | Eripuit me de inimicis meis fortissimis, et ab his qui oderunt me, quoniam confortati sunt super me. |
| 26 | Praevenerunt me in die afflictionis meae, et factus est Dominus protector meus. |
| 27 | Oratio. |
| 28 | Regnator omnium saeculorum, Domine, qui spiritualem cibum omni animae opportuno ministras in tempore: concede nobis te perpetualiter benedicere, tuamque potentiam cum electis tuis fiducialiter exaltare. |
| 29 | Per Dominum nostrum Iesum Christum. |
| 30 | Capitulum. |
| 31 | Liberasti nos, Domine, ex affligentibus nos, et eos, qui nos oderunt, confudisti. |
| 32 | Laus tibi, Domine Rex aeternae gloriae. |