Alcuinus, Officia per ferias, PSALMUS.
| 1 | (PSAL. XXXIII.) Benedicam Dominum in omni tempore, semper laus eius in ore meo. |
| 2 | In Domino laudabitur anima mea: audiant mansueti et laetentur. |
| 3 | Magnificate Dominum mecum: et exaltemus nomen eius in idipsum. |
| 4 | Exquisivi Dominum, et exaudivit me: et ex omnibus tribulationibus meis eripuit me. |
| 5 | Accedite ad eum, et illuminamini: et facies vestrae non confundentur. |
| 6 | Iste pauper clamavit, et Dominus exaudivit eum: et ex omnibus tribulationibus eius salvavit eum. |
| 7 | Immittet angelus Domini in circuitu timentium eum: et eripiet eos. |
| 8 | Gustate et videte, quoniam suavis est Dominus: beatus vir qui sperat in eo. |
| 9 | Timete Dominum omnes sancti eius: quoniam non est inopia timentibus eum. |
| 10 | Divites eguerunt et esurierunt: inquirentes autem Dominum non minuentur omni bono. |
| 11 | Venite, filii, audite me: timorem Domini docebo vos. |
| 12 | Quis est homo, qui vult vitam: diligit dies videre bonos? Prohibe linguam tuam a malo, et labia tua ne loquantur dolum. |
| 13 | Diverte a malo et fac bonum, inquire pacem, et persequere eam. |
| 14 | Oculi Domini super iustos: et aures eius in preces eorum. |
| 15 | Vultus autem Domini super facientes mala: ut perdat de terra memoriam eorum. |
| 16 | Clamaverunt iusti, et Dominus exaudivit eos: et ex omnibus tribulationibus eorum liberavit eos. |
| 17 | Iuxta est Dominus his, qui tribulato sunt corde: et humiles spiritu salvabit. |
| 18 | Multae tribulationes iustorum: et de omnibus his liberavit eos Dominus. |
| 19 | Custodit Dominus omnia ossa eorum: unum ex his non conteretur. |
| 20 | Mors peccatorum pessima: et qui auderunt iustum, delinquent. |
| 21 | Redimet Dominus animas servorum suorum: et non delinquent omnes, qui sperant in eo. |
| 22 | Ut supra. |
| 23 | Protexisti me a conventu malignantium. |
| 24 | Oratio. |
| 25 | Angelorum et totius creaturae dispensator Deus, emitte angelum tuum in circuitu nostro, cuius ambitione muniti, mereamur a peccatorum morte pessima liberari. |
| 26 | Per Dominum. |
| 27 | Alia Oratio. |
| 28 | Inquirentes te, Domine, dignanter exaudi, et ut benedicamur tam in adversis, quam et in prosperis, benignus indulge: atque ut in te laudetur anima nostra, propitius indultor imperti. |
| 29 | Et quia iuxta es his, qui tribulato sunt corde, aurem tuam ad contritionis nostrae spiritus aperi; et pacem tuam, quae exsuperat omnem sensum [Add. concede, vel simile], et corpora nostra et corda purificet. |
| 30 | Per. |