Alcuinus, Officia per ferias, FERIA IV. ORATIO BEATI AMBROSII, FERIA IV. ORATIO BEATI AMBROSII, In qua pro suis peccatis veniam postulat.
| 1 | Miserator et misericors, patiens, et multum misericors, magne et terribilis Deus: tibi confiteor delicta mea, tibi patefacio vulnera mea. |
| 2 | Tu propter ineffabilem bonitatem tuam confer mihi misero medicinam. |
| 3 | Tu enim mitissime, dignatus es dicere: Nolo mortem peccatoris, sed ut convertatur, et vivat. |
| 4 | Confiteor, inique egi: perversa est in conspectu tuo via mea. |
| 5 | Lapsa est in lacum miseriae vita mea, exstincta est in iniquitatibus anima mea. |
| 6 | Superbia, libido, ira, impatientia, malitia, invidia, gula, ebrietas, concupiscentia, rapina, mendacium, periurium, scurrilitas, stultiloquium, ignorantia, negligentia, seu caeterae pestes occiderunt animam meam. |
| 7 | Pollutum est cor meum, et labia mea; visus meus et auditus, gustus, odoratus, et tactus: et omnimodis cogitatione, locutione, sive actione perditus sum. |
| 8 | Quaeso te, Domine Deus, cuius miseratio nullum habet finem, attrahe me sicut attraxisti mulierem peccatricem. |
| 9 | Dona mihi, sicut donasti illi, non cessare osculari pedes tuos, rigare lacrymis, extergere capillis. |
| 10 | Concede mihi, ut secundum magnitudinem iniquitatum mearum sit magna dilectio mea in te: ut propter immensam pietatem tuam omnia dimittas mihi. |
| 11 | Largire mihi de praeteritis veniam, de praesentibus malis continentiam, de futuris cautelam. |
| 12 | Fac me, priusquam moriar, consequi plenissime misericordiam tuam, et ne dies meos ante finiri sinas, quam peccata dimittas: sed sicut vis, et sicut scis, miserere mei. |