Alcuinus, Officia per ferias, PSALMUS.
| 1 | (PSAL. LVI.) Exaudi Domine iustitiam meam: intende deprecationem meam. |
| 2 | Auribus percipe orationem meam, non in labiis dolosis. |
| 3 | De vultu tuo iudicium meum prodeat: oculi tui videant aequitatem. |
| 4 | Probasti cor meum, et visitasti nocte: igne me examinasti, et non est inventa in me iniquitas. |
| 5 | Ut non loquatur os meum opera hominum: propter verba labiorum tuorum ego custodivi vias duras. |
| 6 | Perfice gressus meos in semitis tuis: ut non moveantur vestigia mea. |
| 7 | Ego clamavi, quoniam exaudisti me Deus: inclina aurem tuam mihi, et exaudi verba mea. |
| 8 | Mirifica misericordias tuas, qui salvos facis sperantes in te. |
| 9 | A resistentibus dexterae tuae custodi me ut pupillam oculi. |
| 10 | Sub umbra alarum tuarum protege me, a facie impiorum, qui me afflixerunt. |
| 11 | Inimici mei animam meam circumdederunt: adipem suum concluserunt, os eorum locutum est superbiam. |
| 12 | Proiicientes me, nunc circumdederunt me: oculos suos statuerunt declinare in terram. |
| 13 | Susceperunt me sicut leo paratus ad praedam, et sicut catulus leonis habitans in abditis. |
| 14 | Exsurge, Domine, praeveni eum, et supplanta eum: eripe animam meam ab impio, frameam tuam ab inimicis manus tuae. |
| 15 | Domine a paucis de terra divide eos in vita eorum: de absconditis tuis adimpletus est venter eorum. |
| 16 | Saturati sunt filiis: et dimiserunt reliquias suas parvulis suis. |
| 17 | Ego autem in iustitia apparebo conspectui tuo: satiabor, cum apparuerit gloria tua. |
| 18 | Ut supra. |
| 19 | Ego dixi, Domine, miserere mei, sana animam meam. |
| 20 | Miserere mei, Domine, et exaudi orationem meam. |
| 21 | Intende voci orationis meae, Rex meus, et Deus meus. |
| 22 | Quoniam ad te orabo, Domine, mane exaudies vocem meam. |
| 23 | Oratio. |
| 24 | Converte, Domine, oculos cordis nostri, ad cernendam tui iudicii veritatem, ut, dum hic igne spiritali probamur, de tuis in aeternum conspectibus cum fructu iustitiae satiemur. |