Alcuinus, Officia per ferias, PSALMI POENITENTIALES., PSALMUS III.
| 1 | (PSAL. XXXVII.) Domine ne in furore tuo arguas me: neque in ira tua corripias me. |
| 2 | Quoniam sagittae tuae infixae sunt mihi: et confirmasti super me manum tuam. |
| 3 | Non est sanitas in carne mea a facie irae tuae: non est pax ossibus meis a facie peccatorum meorum. |
| 4 | Quoniam iniquitates meae supergressae sunt caput meum: et sicut onus grave gravatae sunt super me. |
| 5 | Putruerunt et corruptae sunt cicatrices meae: a facie insipientiae meae. |
| 6 | Miser factus sum et curvatus sum usque in finem: tota die contristatus ingrediebar. |
| 7 | Quoniam lumbi mei impleti sunt illusionibus: et non est sanitas in carne mea. |
| 8 | Afflictus sum et humiliatus sum nimis: rugiebam a gemitu cordis mei. |
| 9 | Domine, ante te omne desiderium meum: et gemitus meus a te non est absconditus. |
| 10 | Cor meum conturbatum est, dereliquit me virtus mea: et lumen oculorum meorum, et ipsum non est mecum. |
| 11 | Amici mei et proximi mei adversum me appropinquaverunt et steterunt. |
| 12 | Et qui iuxta me erant de longe steterunt: et vim faciebant, qui quaerebant animam meam. |
| 13 | Et qui inquirebant mala mihi, locuti sunt vanitates: et dolos tota die meditabantur. |
| 14 | Ego autem tanquam surdus non audiebam: et sicut mutus non aperiens os suum. |
| 15 | Et factus sum sicut homo non audiens: et non habens in ore suo redargutiones. |
| 16 | Quoniam in te, Domine, speravi, tu exaudies me, Domine Deus meus. |
| 17 | Quia dixi: nequando supergaudeant mihi inimici mei: et dum commoventur pedes mei, super me magna locuti sunt. |
| 18 | Quoniam ego in flagella paratus sum: et dolor meus in conspectu meo semper. |
| 19 | Quoniam iniquitatem meam annuntiabo, et cogitabo pro peccato meo. |
| 20 | Inimici autem mei vivunt, et confirmati sunt super me: et multiplicati sunt, qui oderunt me inique. |
| 21 | Qui retribuunt mala pro bonis, detrahebant mihi: quoniam sequebar bonitatem. |
| 22 | Ne derelinquas me, Domine Deus meus: ne discesseris a me. |
| 23 | Intende in adiutorium meum, Domine Deus salutis meae. |
| 24 | Preces ut supra. |
| 25 | Domine, ante te omne desiderium meum, et gemitus meus a te non est absconditus. |
| 26 | Exaudi orationem meam, Domine, et deprecationem meam: auribus percipe lacrymas meas. |
| 27 | Complaceat tibi, Domine, ut eruas me: Domine ad adiuvandum me respice. |
| 28 | Oratio. |
| 29 | Emitte, Domine, salutare tuum infirmitatibus nostris, vulnerum cicatricumque mortalium potentissime medicator; ut omnem gemitum doloremque nostrum coram te deplorantes, valeamus evincere insultationes adversantium vitiorum. |
| 30 | Per Dominum nostrum. |