Alcuinus, Officia per ferias, PSALMI POENITENTIALES., PSALMUS I.
| 1 | (PSAL. VI.) Domine, ne in furore tuo arguas me: neque in ira tua corripias me. |
| 2 | Miserere mei Domine, quoniam infirmus sum: sana me Domine, quoniam conturbata sunt ossa mea. |
| 3 | Et anima mea turbata est valde: sed tu Domine usquequo? Convertere Domine, et eripe animam meam, salvum me fac propter misericordiam tuam. |
| 4 | Quoniam non est in morte, qui memor sit tui: in inferno autem quis confitebitur tibi? Laboravi in gemitu meo, lavabo per singulas noctes lectum meum: lacrymis meis stratum meum rigabo. |
| 5 | Turbatus est a furore oculus meus: inveteravi inter omnes inimicos meos. |
| 6 | Discedite a me, omnes qui operamini iniquitatem: quoniam exaudivit Dominus vocem fletus mei. |
| 7 | Exaudivit Dominus deprecationem meam, Dominus orationem meam suscepit. |
| 8 | Erubescant, et conturbentur vehementer omnes inimici mei: convertantur et erubescant valde velociter. |
| 9 | Ut supra. |
| 10 | Domine, convertere, et eripe animam meam; salvum me fac propter misericordiam tuam. |
| 11 | Respice, et exaudi me, Domine Deus meus, illumina oculos meos: ne unquam obdormiam in morte, ne quando dicat inimicus meus: Praevalui adversus eum. |
| 12 | Ab occultis meis munda me, Domine, et ab alienis parce servo tuo. |
| 13 | Oratio. |
| 14 | Exauditor omnium Deus, exaudi nostrorum fletuum supplicem vocem, et tribue infirmitatibus nostris perpetuam firmitatem [Cod. Reg., perpetuam sospitatem]: ut dum dignanter gemitum nostri laboris suscipis, tua nos semper misericordia consoleris. |
| 15 | Per Dominum |