Alcuinus, Officia per ferias, IN NOMINE DEI SUMMI INCIPIT SCRIPTUM ALBINI MAGISTRI AD CAROLUM IMPERATOREM.
| 1 | Beatus igitur David rex magnus et servus Dei altissimi nobis psallendi regulam dedit, qualiter per dinumeratas horas quaslibet homo ad Deum preces fundere debeat, ita dicens Septies in die laudem dicam tibi (Psal. CXVIII, 164). |
| 2 | Hoc est prima hora, secunda, tertia, sexta, nona, vespertina et duodecima. |
| 3 | Per has itaque septem horas David rex laudem dicebat Deo, sed et sanctus Daniel propheta tertia et sexta et nona hora diei ad deprecandum Dominum ascendens in solarium suum expansis manibus ad coelum deprecabatur Deum pro se et pro populo Israel. |
| 4 | Sed et idem rex David adhuc dixit: Et adiiciam super omnem laudem tuam (Psal. LXX, 14). |
| 5 | Proinde rursus ait: Media nocte surgebam ad confitendum tibi (Psal. CXVIII, 62). |
| 6 | Id est, nocturna hora. |
| 7 | Et iterum ait: Memor fui in nocte nominis tui, Domine (Ibid., V. 55), quod est gallorum cantus. |
| 8 | Sic memor fui tui super stratum meum, in matutinis meditabor in te (Psal. LXII, 7). |
| 9 | Hi sunt per noctes tres officii cursus, et per diem septem: quibus aptis [F., iunctis] simul efficiuntur decem, quos nos secundum decem verba legis Moysi sectantes cantamus. |
| 10 | Sed quia vos rogastis, ut scriberemus vobis breviarium commatico sermone, qualiter homo laicus qui adhuc in activa vita consistit, per dinumeratas horas has Deo supplicare debeat: et licet vos, qui Christiano ordine vivitis, Christiana opera facere desideratis, non ignoratis qualiter Domino supplicetur: sed quia rogastis, dicemus breviter quod sentimus. |
| 11 | Cum enim de lectulo stratus vestri surrexistis, dicendum vobis est: dic primum: Domine Iesu Christe, Fili Dei vivi, in nomine tuo levabo manus meas. Dicitur [F., Deus] in adiutorium meum, tres [ita ms.] vicibus cum psalmo: Verba mea, usque: Mane astabo tibi. |
| 12 | Deinde, Pater noster, et preces: Dignare, Domine, die isto: perfice gressus meos: Benedictus Dominus die quotidie: dirigere et sanctificare digneris: Fiat misericordia tua, Domine, super nos. |
| 13 | Et surgens incipiat versum: Domine, labia mea aperies. |
| 14 | Ipso expleto cum gloria incipiat Psalmum: Domine, quid multiplicati sunt. |
| 15 | Deinde sequitur. |
| 16 | Miserere mei, Deus. |
| 17 | Deinde: Venite, exsultemus Domino. |
| 18 | Deinde psalmos quantos voluerit. |