Alcuinus, Epistolae, EPISTOLA CCXI. AD OMNES AMICOS. Commendatitia Noroberet presbyteri peregrinantis ad amicos.
| 1 | Omnibus in Christi charitate amicis, humilis levita Alcuinus salutem. |
| 2 | Ubicunque iste presbyter, Noroberet [Al., Norbet] nomine, in vestram pervenerit praesentiam, obsecro ut benigne eum suscipere dignemini, in quocunque negotio vel necessitate opus habeat. |
| 3 | Certissime Deum habebitis bonitatis vestrae remuneratorem, qui dicturus erit in die iudicii: Hospes eram, et collegistis me (Matth. XXV, 35). |
| 4 | Et si mea quid parvitas poterit, vobis gratiarum actiones in quantalibet causa rependere, studiose et fideliter facere curabo. |
| 5 | Hunc vero, vel alios pro Christi nomine peregrinantes, in sua mansione suscipientem, illum divina in coelesti habitatione suscipiat clementia. |
| 6 | Valete, viri fratres in Christo. |