Alcuinus, Epistolae, EPISTOLA CXCVII. AD FILIAM SPIRITALEM (EUGENIAM). Castitatem cum eleemosynarum largitate commendat.
| 1 | Charissimae in Christo filiae Eugeniae Albinus salutem. |
| 2 | Placet mihi saepius in parvis [Cod. Sal., tametsi in paucis] litteris, non tamen parva officia salutationis tuae dirigere germanitati, et tuis ingerere cogitationibus admonitionis meae, vel promissionis tuae [Cod. Sal., sanctae] salutiferas collationes, quatenus nobilissimum virginitatis decus integro conservare corpore coneris, rememorans gloriosam castitatis mercedem. |
| 3 | Ecce in coelis per magna aeterni regis palatia agnum sequuntur, quocunque ierit (Apoc. XIV, 4). |
| 4 | Quid hac gloria beatius, vel hac beatitudine gloriosius? |
| 5 | Ubi naturae [Cod. Sal., natura] victor omnium conditori creaturarum consociabitur. |
| 6 | Nec labor quotidianus deterreat, quem spes tantae remunerationis consolabitur. |
| 7 | Paucorum labor dierum aeternis remunerabitur praemiis. |
| 8 | Sit quoque virginitas eleemosynarum largitate fertilis, nec sibi caducas divitiarum gazas avida congreget manu: sed larga mente in membra sui distribuat sponsi. |
| 9 | Geminis, charitatis scilicet et castitatis pennis, ad alta coelorum regna transvolet. |
| 10 | Nec virgo, carnis concupiscentiae vinculis libera, avaritiae laqueis constringatur, sed sui ipsius victrix, etiam saeculi ignavia, cupiditati [Cod. Sal., ignava cupiditate] non succumbat: sed sibi misericordiae operibus, quasi ramis virentibus, in arcem coelestis Hierusalem viam sternat, ubi laudibus excepta angelicis magni imperatoris thalamum aeterna introducatur laetitia. |
| 11 | Ut hoc fieri valeat, vigilare debet huius inquisitor margaritae, non inertiae sopitus somno dormitare: imo saepius orationibus nocturnis vel diurnis pulsare ianuas perpetuae civitatis; et veniens apertas inveniet, quas quisque ab hoc carnali carcere deductus, nimium intrare cupiet; quod ante summa diligentia praevidere debet, ut portas tunc inveniat patentes, angelicosque choros suscipientes obviis manibus animam ad deducendum in cubiculum regis aeternis fruituram gaudiis; perpetuumque laudis carmen decantabit in praesentia sui sponsi dicens: Benedic, anima mea, Dominum et omnia opera eius: in omni loco dominationis eius, benedic anima mea Dominum (Psal. CII, 1 et 22). |
| 12 | Vivas, valeas et floreas, virgo nobilissima, in Christo. |