Alcuinus, Epistolae, EPISTOLA CLXXXI. AD QUEMDAM. Hortatur ad pietatem, reliquasque virtutes: commendat curam divinae laudis in ecclesiis illi commissis.
| 1 | Pars mea, dixit Dominus animae meae (Tren. III, 24). |
| 2 | Pars mea, dixit pater filio suo, cui sit pars cum sanctis in aeternum. |
| 3 | Tuae beatitudinis perlectis litteris gaudebam de tuae prosperitatis salute, cuius praesens quantum valui fautor fui; etiam et nunc absens cupidus. |
| 4 | Et utinam, ut litteris promisisti, memor sis antiquae paternitatis et dulcedinis inter nos in Domino, qui semper nos in sua provehat voluntate, et proficere faciat in suis mandatis. |
| 5 | Memores simus, quod nos de stercore erexit, et posuit inter principes populi sui (Psal. CXII, 7 et 8); non nostris meritis, sed sua gratuita misericordia; cui semper gratias agamus in omni vita nostra, ut ille, qui exaltavit, etiam conservet. |
| 6 | Omnes vero ecclesias, quas, Deo donante, ad regendum accepistis, diligentissime in Dei laude exorna. |
| 7 | Sint in eis canonicis horis Psalmorum melodia, orationum instantia, missarum solemnia et intercessiones pro te tuisque amicis. |
| 8 | Sint tibi, fili mi, mores [Canis., filii minores] cum honestate et temperantia, vestimentorum moderatus cultus, convivia non in luxuria et ebrietate, sed in sobrietate et congruentia temporibus et personis. |
| 9 | Ubique Dei timorem ante oculos habeas. |
| 10 | Humilitas te exaltet, et veritas honorabilem faciat, et misericordia amabilem. |
| 11 | Sit tua manus pauperibus larga, amicis benigna. |
| 12 | Esto fidelis dispensator domui Dei. |
| 13 | Esto forma salutis omnibus tecum habitantibus (I Thessal. I, 7). |
| 14 | Et quia Deus te honore nobilem fecit, esto quoque et moribus nobilis. |
| 15 | Luceat lux tuae bonitatis coram omnibus. |
| 16 | Glorificetur in te Pater coelestis, qui te in hac praesenti vita custodiat, et in futura vita gloriam tibi cum sanctis concedat aeternam. |
| 17 | Pars mea, pars, valeas; semper sit pars tua Christus.
|
| 18 | Esto memor patris, pars, precor, alma tui.
|